Thu, 15 Nov 2018
32
Manila

TAGBILARAN CITY, Bohol, Oct. 9 (PIA)-Subay sa panglantaw nga ang pantalan sa Tagbilaran makaambas sa mga international nga lagda sa pagpadagan sa luwas ug makatagbaw nga serbisyo, gipatuman sa Philippine Ports Authority (PPA) ang mas hugot nga mga palisiya alang sa luwas nga dunggu-anan.

"Kon kanhi ang pantalan gihimo nga suroyanan, tambayanan ug pangisdaan sa mga katawhan, sa sugo sa maayong pagdumala, did-an na kining tanan," matud ni PPA Port Manager Engr. James Gantalao.

"Pipila lamang ka minutos nga gitugot sa PPA ug sa port police nga makatambay ang usa ka tawo sa pantalan, apan kinahanglan nga dili na siya magdugay pa kay mahimo na siya nga security issue," pasabot usab sa Port Police.

Ang palisiya nga gipatuman hinuon, dili lamang gigamit alang sa Bohol apan usab sa mga dunggu-anan nga may mga international nga bisita, segun pa sa maritime security task force nga giapilan sa PPA, Maritime Authority of The Philippines, Maritime Police sa Philippine National police, Philippine Coast Guard ug sa mga shippers.

"Aduna kita'y gisubay nga tamdanan sama sa lagda sa International Maritime Organization (IMO) alang sa mas luwas, mas organisado ug mas maayo nga kasinati-an sa mga pasahero nga lumalabay, ug kana maoy atong gipaningkamotan nga ikapatuman, dili lamang sa pantalan sa Tagbilaran, kon dili lakip na usab sa mga pantalan nga gidumala sa PPA dinhi sa giila na sa mga turista nga isla'ng paraiso sa Bohol," saysay ni Engr Gantalao.

Ang pagpatuman sa mga lagda sa IMO, usa ka rekisito aron ang usa ka pantalan nga dunggu-an sa mga barko nga langyaw ug giluwanan sa mga langyaw, pasabut ni Gantalao, kang kinsa nga pamunu-an giila na usab nga labing maspas ug labing maayong pagdumala sa mga pantalan sa Bohol bisan pa sa pagpangaguba niini niadtong linog sa 2013.

"Alang sa kaluwasan sa tanan ug sa seguridad sa atong pasilidad, gi-tumbok lamang nga may klaro nga tuyo sa PPA ug sa pantalan ang makasulod sa ikaduha nga gate, diin tua usab didto ang mga delikado nga pagpadagan sa kargamento nga mahimong tinubdan sa disgrasya," saysay-pasabut ni Gantalao.

Subay usab sa IMO, ang nagdumala sa pantalan gitugotan nga magtumbok sa mga lugar nga himoon nga secure, ilabi na niadtong mga duol sa sabotahe.

"Wala kita masayud kon tugotan nato ang tawo nga wala'y tuyo nga mosulod sa pantalan apan magbilin diay og hulga sa seguridad sa mas daghan, dugang sa hepe sa PPA dinhi sa Bohol.

Atong gilikayan ang hulga sa risgo ug seguridad sa atong mga bisita, kliyente ug mga nanarbaho sa pantalan, ug mas mapadako ang hulga kon wala kita'y ipatuman nga paghugot sa seguridad, dugang usab ni Lieutenant Erikson Laza sa Philippine Coast Guard (PCG).

Subay niini, may mga gisukod na nga mga lugar sa pantalan nga dili na masudlan sa ordinaryo nga mga tawo kon walay pagtutok sa mga tinugyanan.

Dugang pa, may mga lugar usab nga dili na masudlan bisan sa dagat ilabi na kon may mga barko nga naa sa duol.

"Mas maayo na nga mangandam na daan, kay sa magmahay na lang," panapos sa port police. (rahc/PIA-7/Bohol)

More Philippines News

Access More

Sign up for Philippines News

a daily newsletter full of things to discuss over drinks.and the great thing is that it's on the house!