Wed, 21 Aug 2019

Cebuano News: National Dengue Alert, gi-deklarar sa DOH

Philippine Information Agency
17 Jul 2019, 18:38 GMT+10

MANILA, July 16 (PIA)--Sa labing unang higayon, nagdeklarar niadtong Lunes, Hulyo 15 og National Dengue Alert" ang Department of Health (DOH) human ang paspas nga pagdaghan sa natalang dengue cases sa pipila ka rehiyon sa nasod.

Sa gipahigayong press conference sa kaolohan, si DOH Kalihim Francisco Duque III mibutyag nga sugod Enero hangtod Hunyo 29 lamang ning tuig, nikabat na sa 106,630 ang mga kaso sa dengue ang ilang natala sa tibuok nasod.

Giingong mas taas kini og 85 porsiyento kun itandi sa natala nilang kaso sa susamang panahon niadtong tuig 2018. Sa maong gidaghanon, 450 ka pasyente na ang namatay.

Matud pa sa kalihim nga kini ang labing unang higayon nga nagdeklarar sila og national dengue alert aron mapasidan-an ang publiko batok sa maong sakit nga mahimong ikamatay.

"This is the first time that we're declaring a national alert. Because the objective is very clear. We want to raise awareness among the public and more importantly, in communities where signs of early dengue increases are evident," pasabot pa ni Duque.

Apan gi-klaro usab sa kalihim nga walay national epidemic sa sakit, apan localized epidemic lamang.

Pinakadaghang natala nga dengue cases sa Western Visayas nga nikabat og 13,164 ka kaso, gisundan kini sa CALABARZON (11,474 cases), Central Visayas (9,199 cases), SOCCSKARGEN (9,107 cases), ug Northern Mindanao (8,739 cases), nga giingong nilapas na sa epidemic threshold.

Tungod niini, hingpit nga nipahinumdoman ang publiko nga mag-amping aron dili mataptan sa maong sakit nga makuha sa pinaakan sa lamok.

Subling gipahinumdoman sa DOH ang publiko kalabot sa kamahingondanon sa gipatuman nilang '4S' Strategy batok sa dengue nga mao ang 'Search and destroy mosquito breeding places,' 'secure self-protection,' 'seek early consultation' ug 'support fogging/ spraying only in hotspot areas.'

Tambag pa sa buhatan ngadto sa publiko nga kun magbaton og pila ka adlaw nga hilanat ang pasyente ug makitaan og mga sintomas sa maong sakit, mokunsulta dayon sa doktor.

Pipila sa mga sintomas sa dengue mao ang pila ka adlaw nga taas nga hilanat, pagpanakit sa ulo, likod sa mata, mga kaonoran, grabeng kakapoy, pagsuka, pagkalipong, ug pagbaton og mga rashes. (ecb/PIA7-Bohol)

More Philippines News

Access More

Sign up for Philippines News

a daily newsletter full of things to discuss over drinks.and the great thing is that it's on the house!