Wed, 21 Aug 2019

Tagalog News: Mahigit 1,300 bag ng dugo, nakolekta sa Blood Olympics

Philippine Information Agency
13 Aug 2019, 18:38 GMT+10

LUNGSOD NG BATANGAS, Agosto 13 (PIA)- Mahigit sa 1,300 bag ng dugo na may 450cc bawat isa ng ang nakolekta sa magkasunod na Blood Olympics na isinagawa ng Batangas Provincial Blood Council (BPBC) sa lungsod ng Tanauan at bayan ng Calaca.

May 807 bags ang nakolekta sa isinagawang Blood Olympics sa Tanauan City kung saan nakipagtulungan ang BPBC sa pamahalaang lungsod at ABS CBN Blood Donation Project na ginanap sa Tanauan Gymnasium noong Hulyo 31,2019.

Sa mensahe ni Mayor Angeline Halili, sinabi nito na suportado niya ang mga ganitong aktibidad sapagkat ito ay malaki ang maitutulong hindi lamang sa mga Tanauenong maysakit kundi maging sa ibang mga Batanguenong nangangailangan.

Ayon naman kay Dr. Noel Pasion, kinatawan mula sa Department of Health Region IV-A, ang lalawigan ng Batangas ay regular ang ginagawang blood donation projects kung kaya't naabot na nito ang 1% requirement ng population at nahigitan pa.

"Binabati ko ang mga bumubuo ng Batangas Provincial Blood Council dahil sa masigasig na pagsasagawa nila ng ganitong aktibidad, mas maraming tao ang maaaring makinabang dito lalong lalo na ang mga higit na malaki ang pangangailangan sa dugo," ani Pasion.

Nagkaroon din ng libreng eye check-up, libreng gupit at mobile kitchen na hatid ng ABS CBN.

Samantala, sa ginanap na Blood Olympics sa bayan ng Calaca noong Agosto 7, 2019 nakakalap ng kabuoang 552 bags.

Sa mensahe ni Dr. Sharon Ona, pinuno ng Calaca RHU, sinabi nitong regular na ginagawa ng kanilang tanggapan ang ganitong aktibidad upang mas maraming iba't-ibang uri ng dugo ang makolekta at makatugon sa anumang pangangailangan lalo na ng mga maysakit at iba pa.

"Hinihikayat ko po ang lahat na mag-donate ng dugo dahil ito po ay makakabuti sa ating katawan, mas lalo pong nagiging malusog ang isang tao at mas masigla kapag siya ay nagdonate ng dugo dahil napapalitan ang lumang dugo sa kanilang katawan. Sana po maging regular na adbokasiya ito ng mga Calaqueno, maging ang mga empleyado po ng pamahalaang lokal ay hinahangad naming gawing practice ito para sa mas magandang kalusugan," ani Ona.

Ang Blood Olympics ay regular na blood donation project na isinusulong ng BPBC upang makakalap ng sapat na bilang ng dugo na magagamit ng mga maysakit na Batangueno at maging tag-ibang lugar. Iba't-ibang ahensya ang nakikibahagi dito tulad ng Philippine National Red Cross, Batangas Medical Center, Provincial Health Office, mga lokal na pamahalaan at marami pang iba.

Kamakailan ay ginanap ang Sandugo Awards kung saan ang bayan ng Calaca ay may 2018 target na 877 bag ng dugo ngunit nalagpasan nila ito at nakakolekta ng 1,448 na bag. Ang Tanauan City naman ay may 2018 target na 1,858 bag ay nakakuha ng 2,153 bag ng dugo. (BHABY P. DE CASTRO-PIA BATANGAS)

More Philippines News

Access More

Sign up for Philippines News

a daily newsletter full of things to discuss over drinks.and the great thing is that it's on the house!