Sun, 22 Sep 2019

Cebuano news: DOH NorMin andam na alang sa 'Back to Bakuna' 2019

Philippine Information Agency
23 Aug 2019, 16:38 GMT+10

VALENCIA CITY, Bukidnon, Hulyo 24 (PIA) - Andam na ang Department of Health (DOH), pinaagi sa Northern Mindanao Center for Health Development, alang sa "Back to Bakuna" nga programa niini nga gitakda diha sa mga pampublikong eskwelahan, ning bulan sa Hulyo hangtud Septiyembre ning tuig.

Tumong sa programa nga ma-bakunahan ang mga estudyante sa Grade 1 ug Grade 7, apil ang mga babaye nga Grade 4 nga nag-edad ug siyam (9) hangtud katorse (14) anyos.

Atol sa gipahigayon nga "Kalasag ng Kalusugan Karavan" ning milabay'ng Miyerkules didto sa Valencia City Cultural Center, naghi-usa ang mga 'health professionals, magtutudlo, ug mga trabahante sa lokal nga kagamhanan, aron suportahan ang DOH diha sa kampanya niini aron ipahibalo ug ipasabot sa katawhan nga ang Bakuna makatabang kaayo aron maoy magsilbi nga 'shield' kon 'sagang' sa tawo batok sa partikular nga sakit ug nga makatabang kini aron luwas ug dili takbuyan sa makapatay nga sakit.

Si Dr. Elma Oclarit, ang hepe sa Family Health Center sa DOH-10, miingon nga ang ang "Back to Bakuna" para sa 'measles, mumps, rubella, tetanus, ug diphtheria, didto kini idapat sa Grade 1 ug Grade 7 nga mga estudyante; samtang ang duha ka bakuna sa Human Papillomavirus (HPV) para kini sa Grade 4 nga mga babaye nga naa sa edad siyam (9) hangtud katorse (14) anyos-diin, ang ikaduha nga hugna kon 'second dose' niini didto na idapat pagkahuman sa unom (6) ka bulan.

"Ang mga estudyante sa pampublikong eskwelahan kinahanglan mo-sumite o motunol sa pinirmahan nga 'Parental Consent' ngadto sa ilang maestro/maestra. Kauban sa 'Parental Consent' ilakip ang 'immunization record'. Pinaagi sa immunization record, mahibaw-an na daan sa 'health care professional nga maoy magpahigayon sa bakuna, kung unsa pa nga mga bakuna ang kinahanglan ihatag. Ug labaw sa tanan, kadtong mga estudyante ra nga naay 'Parental Consent' ang mahatagan sa libre nga Bakuna,"dugang ingon ni Dr. Oclarit.

Kini nga "school-based immunization program" tinuig kini nga gina-implementar sa DOH, sa pakigtambayayong sa Department of Education ug sa Department of the Interior and Local Government. Kasagaran kini ginapahigayon sa bulan sa Agosto kada tuig. (Crislucia R. Sazon, HEPO, DOH-CHDNM/RLRB, PIA Bukidnon)

Sign up for Philippines News

a daily newsletter full of things to discuss over drinks.and the great thing is that it's on the house!