Sun, 20 Oct 2019

Cebuano news: 25 ka NPA, Militia ng Bayan mi-surender sa Bukidnon

Philippine Information Agency
14 Sep 2019, 18:38 GMT+10

MARAMAG, Bukidnon, Sept. 9 (PIA) - Baynte-singko (25) ka mga rebeldeng New People's Army (NPA) ug Militia ng Bayan kon mga tig-suporta sa NPA ang mi-surender sa 88th Infantry "Maringal" Battalion sa Maramag, Bukidnon.

Si Lt. Col. Franklin F. Fabic, 88IB Commander, miingon nga ang mga misurender nag-'operate' ubos sa Coy Thunder, Sub Regional Committee 2 (SRC 2), Southern Mindanao Regional Committee (SMRC).

"Pinaagi sa kooperasyon ug panagsabot, nakahukom sila nga undangon ang walay pulos nga pakigbatok sa gobyerno. Kini nahitabo pud tungod sa Community Support Program (CSP) nga gipahigayon sa tropa didto sa Sitio Mikatin, barangay Kipaypayon ug sa Sitio Logdeck 5, Barangay Magsaysay, Quezon, Bukidnon," miingon si Fabic.

Gi-surender sab nila ang mga armas ug suplay sama sa usa ka pusil nga Garand; duha ka 'home-made' nga shotgun; usa ka .38 kalibre nga pistola; pito ka 'jerry can' nga puno sa bugas humay; duha ka generator set; tulo ka cellphone; duha ka rolyo sa 'electrical wire'; usa ka Automatic Voltage Regulator; mga medikal ug dental suplay; 34 ka 'round' sa kalibre 30 nga mga bala; walo ka 'round' sa 12-gauge nga mga bala sa shotgun; ug lima ka 'round' sa kalibre 38 nga mga bala.

Si alyas Junjun nga lider sa Militia ng Bayan, miingon: "Nag lisod na mi sa kabukiran. Daghan pasalig ang CPP-NPA nga hatagan mi ug yuta kung mudaog mi sa among pakigbisog. Pero bakak lang diay ang tanan. Nisamot kalisod ang among kahimtang sa bukid tungod kay sige ug 'operation' ang kasundaluhan, mao nga nag desisyon mi nga mo-surrender. Dako among pasalamat sa gobyerno, sa kasundaluhan, ug sa Mayor sa Quezon tungod sa tabang nga ilang gihatag sa amo para sa among pagkinabuhi nga malinawon."

Gikalipay ug maayo sa mga awtoridad ang gihimo nilang desisyon sa pag-surender ug pagbalik sa sabakan sa bala-od.

Matud sa army, kini maoy nagpamatuod nga epektibo ang CSP nga gipahigayon sa tropa diha sa mga lugar nga naay armadong pakigbisog diin tumong niini nga maundang ang mga paglingla ug pagpangilad sa mga mga teroristang NPA diha sa komunidad.

"Ang atong makanunayon nga pag-gukod sa mga terorista, nakapaluya sa mga NPA tungod kay misamot ang ilang kalisod sa kabukiran. Busa, kamong mga terorista, labi na sa mga sakop sa Coy Thunder, mas maayo nga mo-surender na kamo samtang naa pay panahon, kay kung dili, ang Dragon Warrior dili mohunong pag-gukod ninyo bisan asa pa mo magtago," dugang ni Lt. Col. Fabic. (Norven Jay Garcia, CMO Officer, 88th Infantry Battalion, 4ID, PA/RLRB, PIA Bukidnon)

More Philippines News

Access More

Sign up for Philippines News

a daily newsletter full of things to discuss over drinks.and the great thing is that it's on the house!