Sun, 20 Oct 2019

Cebuano News: NFA mihangyo sa mga mag-uuma: Sa NFA ibaligya ang ani

Philippine Information Agency
15 Sep 2019, 00:38 GMT+10

TAGBILARAN CITY, Sept. 9 (PIA) -- Nanawagan ang National Food Authority (NFA) sa mga mag-uuma nga sa NFA nalang ibaligya ang ilang mga abot nga humay.

Sa usa ka pahayag, miingon si NFA Administrator Atty. Judy Carol Dansal nga mas taas ang palit nila sa humay kun itandi sa mga rice traders nga una na nga nataho nga 'gibarat' ang pagpalit sa presyo sa humay.

Gidugang usab ni Dansal nga mokabat sa P20.70 sentimos matag kilo kun sila ang mopalit niini.

Kahinumdoman nga una nang gimanduan ni Presidente Rodrigo Duterte ang NFA ug Department of Agriculture (DA) nga paliton ang humay sa mga mag-uuma sa saktong kantidad.

Taliwala kini sa pagreklamo sa pipila ka mga mag-uuma sa pag-ubos sa presyo sa humay sa P7 matag kilo kun itandi sa P21 matag kilo kaniadtong wala pa ipatuman ang Rice Tariffication Law.

Matud pa ni Duterte, dili na sapayan kun maalkansi ang gobyerno basta seguradohon lamang nga matabangan ang mga mag-uuma sa nasod.

Gidepensaan sa Presidente ang gilagdaang Rice Tariffication Law tungod kay giingong kinahanglan i-konsiderar ang kaayohan sa kadaghanan.

Ang Rice Tariffication Law personal nga gipangayo sa mga economic managers sa Duterte administration isip usa sa mga nakita nilang paagi aron masolusyonan ang taas nga inflation rate o pagpaspas sa pagsaka sa presyo sa mga palaliton. (ecb/PIA7-Bohol)

More Philippines News

Access More

Sign up for Philippines News

a daily newsletter full of things to discuss over drinks.and the great thing is that it's on the house!