Sun, 20 Oct 2019

Cebuano News: PCG magpabarug og radar alang sa seguridad sa rehiyon

Philippine Information Agency
15 Sep 2019, 16:38 GMT+10

BALICASAG ISLAND, Panglao, Sept. 12 (PIA) -- Human sa gitagal nga panahon, mobarug na dinhi sa Isla sa Balicasag ang usa ka estasyonan sa radar nga magdugang na unya sa kapasidad sa Pilipinas sa pagbantay sa iyang kadagatan batok sa mga ilegalista ug mga criminal nga migamit sa kadagatan sa ilang mga tinguha.

BARKONG PANGPATROLYA. Luwan sa BRP Suluan ang bahans a Goberandor nga maoy pinasidunggang dinapit paglubong sa time capsule sa multi-million nga radar facility sa isla. Ang mga barkong iya sa Coast Guard, masuportahan na unya sa stationary radar alang sa mas tuumbok nga lokasyon sa mga gidudahang ilegal nga sakyanans a dagat. (rahc/PAI-7/Bohol)

Kini human sa opisyal nga ground-breaking ug paglubong sa time capsule sa P39 milyones nga tulo ka andana nga radar facility nga mahimong maka-monitor, magtumbok ug mag-ila sa tanang sakyanan sa dagat nga naa sa kadagatan sa Bohol, Cebu ug Negros Oriental, o sa distansya nga dul-an sa 47 kilometros palibot sa Balicasag.

Mismo si Gobernador Arthur Yap, kauban ni Commodore Jose William Isaga sa ngalan ni Philippine Coast Guard Commandant nga si Admiral Elson Hermogino, si District Commander sa Central Visayas Ronnie Gil Gavan, ug si Aya Montero sa lungsod sa Panglao ang nanguna sa seremonyas sa paglubong sa time capsule nga nagtipig sa plano sa P10 milyones nga gambalay nga puy-an unya sa mga modumala sa radar facility.

Ang radar o radio detection and ranging usa ka sistema sa pagmatikod sa presensya, rumbo, gilay-on, ug gikusgon sa usa ka sakayan sa dagat, sakyanan sa kahanginan ug uban pa nga dagkong butang pinaagi sa pag-labay sa nagpulso nga high-frequency electromagnetic waves nga mopalakra sa unsa may iyang gitan-aw ug ibalik kini ngadto sa radar base aron makit-an ang dagway sa gitutokan niini.

Mokabat sa P 19 milyones usab ang ekipo sa radar nga itaud sa Balicasag, matud pa ni Bohol Coast Guard Commander Lieutenant Patrick John Cabasag.

Matud ni Commodore Isaga, swerte ang Bohol kay dinhi itukod ang usa sa 20 ka mga radar facilities nga ipabarug dinhi sa Visayas ug Mindanao, sa dili pa kini himoon na usab sa Luzon.

DUGANG ASSET. Ang radar sa Balicasag makaabag usab sa maritime nga kapolisan sa pagpatuman sa balaod sa kadagatan. Daghan dinhi nga dagata ang ilegal nga mangisda. (rahc/PIA-7/BOhol)

Ang radar sa Balicasag, dugang niya, may kapasidad sa paghimo og tibuok adlaw nga pagbantay, pagmonitor, pagtumbok ug pag-ila sa sa tanang sakyanan sa dagat ug hangin nga molabay sulod sa iyang maabut, pito ka adlaw, 12 ka buwan ug hangtud nga buhi pa ang pasilidad.

Ang pasilidad, matud pa ni Commodore Isaga, magpugong sa usa ka buhat nga tinerorista sa rehiyon, ilabi na kay ang Balicasag, naa sa maayong lokasyon sa pagbantay sa kadagatan nga gisawhan sa Oslob, Dumaguete, Apo Island, Siquijor ug sa habagatan nga Bohol.

Gani, matud sa Coast Guard, ang radar facility, ilang isumpay ngadto sa tanang radar facility nga luwan sa mga barko ug floating assets sa Coast Guard, alang sa mas lapad ug walay buho nga kalusotan nga pagbantay.

Ug, ubay usab sa kapasidad nga makita na ang bisan kinsa nga maghimo og illegal nga buhat sa nahisgutang kadagatan, sunod nga lakang sa PCG mao ang pagpahimutang sa mga paspas molawig nga mga barko pangpatrolya, nga jetski, mga all terrain vehicles alang sa coastal patrol units ug ang usa ka company-sized quick reaction force alang sa tourist related safety incident response and rescue, dugang ni Isaga.

Kini nga reaction force sa special operations team sa PCG, mga divers nga maghupot og hi-tech nga gamit ug mga gradwado sa Basic Life Support Systems.

Si Commodore Isaga, nga maoy hepe sa Coast Guard Weapons, Communication and Information Systems Command, milaum nga ang Bohol, pinaagi niining pasilidad, mamahimo nga superstar sa turismo sa paghupot sa dugokan sa seguridad sa Sentro nga Kabisay-an.

Sa laing bahin, si Gobernador Yap nagpasalamat sa Coast Guard sa gihimo niini samtang iyang gisaad ang suporta sa laraw nga himoon ang Balicasag nga sentro sa seguridad sa rehiyon alang sa turismo. (rahc/PIA-7/Bohol)

More Philippines News

Access More

Sign up for Philippines News

a daily newsletter full of things to discuss over drinks.and the great thing is that it's on the house!