Thu, 21 Nov 2019

Hiligaynon News: Capiz nakakuha 'full compliance' sa road clearing

Philippine Information Agency
18 Oct 2019, 16:38 GMT+10

SYUDAD SANG ROXAS, Capiz, Oktubre 18 (PIA) - Ginpahayag ni Department of the Interior and Local Government (DILG) - Capiz Provincial Director John Ace Azarcon nga nakakuha sang "full compliance" nga rating ang probinsya sang Capiz sa natapos na nga validation kaangut sa "road clearing operations."

Ang nasambit nga kadalag-an ang ginpaabot ni Azarcon sa sinapol sang mga katapu sang Capiz Association of Government Public Information Officers, Inc. (CAGPIO) sa Ivisan Municipal Hall sadtong Oktubre 15 agud mapahibalo sa mga Public Information Officers ang hinimuan sang mga lokal nga panguluhan kaangot sa DILG Memorandum Circular No. 121-2019.

Nahibaluan nga ang syudad sang Roxas kag mga kabanwahanan sang Pilar, President Roxas, Sapian, Cuartero kag Tapaz ang nakakuha sang "high compliance" samtang ang mga kabanwahanan sang Panay, Pontevedra, Maayon, Panit-an, Mambusao, Jamindan, Dumarao, Dao kag Ivisan ang nakakuha sang "medium compliance" kaangot sa ila tagsa ka mga operasyon agud nga mahawanan sang mga nagasablag ukon obstruksyon ang mga dalanon kag bangketa.

Ang mga banwa sang Dumalag kag Sigma ang nakakuha sang "low compliance."

Gindugang pa ni Azarcon nga ang "low compliance" nga mga lokal nga panguluhan ang liwat nga iga-validate agud nga makumpirma kag mahibaluan ang mga kabangdanan sang manubo nga hinimuan sang natungdan nga banwa.

Samtang ginpabutyag pa gid sang hepe sang DILG - Capiz nga may validation pa gid nga patigayunon sa Disyembre para sa tanan nga mga lokal nga panguluhan nga magalakip na sang ila mga hinimuan sa pagpanghawan sang mga tertiary roads kapareho sang barangay road, feeder road kag pribado nga mga dalan nga ginagamit bilang public access.

Ang validation sa Disyembre ang umpisa sang tagsa ka kwarter nga assessment kag pag-monitor sa mga lokal nga panguluhan kaangot sa "road clearing" nga direktiba.

Matandaan nga si Pangulong Rodrigo R. Duterte ang nagmandu sa pagbawi sang mga pampubliko nga mga lugar nga ginagamit sa pribado nga katuyuan sa iya ikaapat nga State of the Nation Address sang nagligad nga Hulyo.

Ang direktiba sang Presidente ang nagtulod sa DILG nga mag-isyu sang MC No. 121-2019 nga nagahingyo sa mga lokal nga opisyal nga gamiton ang ila otoridad agud nga mahawanan ang mga dalanon sang iligal nga mga istruktura kag iban pa nga nagasablag sa karsada. (JBG/AAL/PIA6 Capiz)

More Philippines News

Access More

Sign up for Philippines News

a daily newsletter full of things to discuss over drinks.and the great thing is that it's on the house!