Thu, 09 Jul 2020

Cebuano News: 17 milyones panimalay apil sa Ika-2 nga hugna sa SAP

Philippine Information Agency
26 May 2020, 14:38 GMT+10

CORTES, Bohol, May 26 (PIA) -- Gipagawas na sa Malakanyang ang Memorandum nga nagpasugod sa pagpabuhi sa ikaduha nga hugna sa dinali-an nga tabang pinansyal alang sa mga kapin sa 17 milyones ka kabus, ubos ug kita ug mga hilabihan ka apektado sa mga lakang nga magpugong sa dugang pagkatag sa coronavirus disease (COVID-19).

Gawas sa nahauna nga mga midawat na sa unang hugna, may lain pa nga 5 ka milyon ka panimalay ang mahiapil sa ikaduhang hugna sa Social Amelioration Program (SAP) sa kagamhanan.

Matud ni Executive Secretary Salvador Medialdea, ang Memorandum nga gipirmahan Mayo 22, nagpabilin pang apil sa mga orihinal nga gidaghanon sa benepisaryo sanglit apil pa sila sa budget.

Sa 17 milyones, ang 12 milyones nga benepisaryo magagikan sa mga lugar nga gipaubos pa sa enhanced community quarantine (ECQ) dala sa mas gipahugtan pa nga security lockdown protocols, apan may mga banay pa nga ubos sa General Community Quarantine (GCQ) nga mahimong maapil pa sa ihap.

Dala niini, gimandu na ni Sec Medialdea ngadto sa Inter-agency Task Force (IATF) for the Management of Emerging Infectious Diseases sa pag-apil na sa laing 5 ka milyon ka mga kabus nga panimalay sa listahan sa mga benepisaryo sa ikaduhang hugna sa dinali-an nga hinabang.

Gipalubad usab ni Medialdia nga samtang natural lamang nga kasagaran nga mga benepisaryo kadtong nagagikan sa mga lugar nga ubos pa sa enhanced community quarantine (ECQ), kadtong mga nenepisaryo nga labing naapektohan sa nagpadayon nga mga pagdili ilabi na sa pagpadagan sa mga trabaho-an sa mga lugar ubos sa general community quarantine (GCQ) mahimong ikonsiderar usab sa second tranche.

Sa tibuok nasud, ang mga syudad sa Cebu ug Mandaue, apil na ang 10 ka barangays sa Navotas City, nagpabilin nga ubos sa ECQ, samtang ang Metro Manila, Laguna ug uban pang bahin sa Central Luzon naa sa modified Enhanced Community Quarantine samtang ang nahibilin nga bahin sa nasud naa na sa GCQ.

Subay pa niini, gimandu na usab ni Sec. Medialdia ngadto sa Department of Social Welfare and Development sa pagpadali sa pag-ugmad sa online portal nga maghimo sa listahan sa mga kwalipekado nga SAP beneficiaries nga makit-an na sa Internet.

Bisan kon kini magpakita usab sa uban nga kasayuran kabahin sa benepisaryo, ilang ipaneguro nga kini subay pa gihapon sa lagda sa Data Privacy Act. (rahchiu/PIA-7/Bohol)

More Philippines News

Access More

Sign up for Philippines News

a daily newsletter full of things to discuss over drinks.and the great thing is that it's on the house!