Sat, 19 Sep 2020

Tagalog News: Market days sa Solano, ipapatupad

Philippine Information Agency
04 Aug 2020, 16:38 GMT+10

SOLANO, Nueva Vizcaya, Agosto 4 (PIA) - Iniutos kamakailan ni Mayor Eufemia Dacayo ang pagtatalaga ng market days para sa 22 na barangay ng bayan upang maiwasan ang COVID-19 infection sa mga mamamayan.

Ayon kay Dacayo, ang Executive Order No. 31 Series of 2020 ay naglalayong ipatupad ang regulasyon sa pagpunta ng mga mamamayan sa palengke upang maiwasan ang hawaan sa COVID-19 dahil sa pagdagsa ng maraming mga mamimili sa pampublikong pamilihan ng bayan.

"Layunin nitong maibaba ang bilang ng mga mamimili sa palengke upang maipatupad ang social distancing at ibang health protocols upang maiwasan ang hawaan ng COVID-19," pahayag ni Dacayo.

Pinulong kamakailan ni Mayor Eufemia Dacayo ang kapulisan tungkol sa pagpapatupad ng kautusan nitong limitahan ang bilang ng mga namamalengke sa public market.. (Litrato na kuha sa FB post ni Mayor Dacayo)

Ayon pa sa kanya, layunin din ng EO na ipatupad ang regular na disinfection sa palengke bilang isa sa mga mabisang paraan upang mapatay ang COVID-19 na maaaring naiwan sa loob ng pampublikong pamilihan.

Base sa EO, ang itinalagang araw ng pamamalengke ng mga barangay at mga karatig na bayan ay ang sumusunod: Barangays Poblacion South at Roaxs kasama ang bayan ng Bagabag at Quezon -tuwing Lunes; Aggub, Bagahabag, Bangar, Bascaran, Concepcion, Curifang, Dadap, Poblacion North, Quirino, Roxas at Tucal -tuwing Martes; Osmenia ar Quezon kasama ang bayan ng Diadi at Villaverde - tuwing Miyekules; Bangaan, Comonal, Lactawan, Osmenia, PD Galima, Poblacion South, Quezon, San Juan, Uddiawan at Wacal -tuwing Huwebes at Poblacion North, Quirino at kasama ang bayan ng Bayombong at ibang bayan - tuwing Biyernes.

Tuwing Sabado, ang mga papayagang barangay ay ang Aggub, Bagahabag, Bangar, Bascaran Concepcion, Curifang, Dadap, Poblacion North, Quirino, Roxas at Tucal habang ang mga barangay naman ng Commonal, Lactawan Osmenia, PD Galima, Poblacion South, Quezon, San Juan, San Luis, Uddiawan at Wacal ay tuwing Linggo.

Ani Dacayo, limitado ang pagbubukas ng pampublikong pamilihan sa linggo mula 8 ng umaga hanggang 12 ng tanghali upang maipatupad ang disinfection ng palengke sa hapon.

"Hindi po natin papayagang pumasok ang mga mamimili na hindi sumusunod sa health protocol gaya ng pagsuot ng face mask, pagsunod sa social distancing at iba pang mga alituntunin sa loob ng palengke," pahayag ni Dacayo.

Ang nasabing utos ay nagkaabisa noong ika-3 ng Agosto at ipatutupad ito ng Philippine National Police (PNP) at mga kaalyado nitong grupo at enforcers ng bayan. (MDCT/BME/PIA 2-Nueva Vizcaya)

More Philippines News

Access More

Sign up for Philippines News

a daily newsletter full of things to discuss over drinks.and the great thing is that it's on the house!